WordPress tizimining ko’pchilik foydalanuvchilar uchun yetarli darajadagi saytni sozlash imkoniyatini beruvchi standart sozlanmalar paneli mavjud. Bu panel orqali saytingizning deyarli barcha qismlaridagi tegishli, kerakli sozlanmalarini o’zingizning talablaringizga mos ravishda o’zgartirishingiz mumkin.

Bundan tashqari WordPress tizimining yashirilgan, sirli sozlanmalar paneli ham borki, unda WordPress asosida ishlaydigan saytingizning barcha mavjud sozlanmalari bitta sahifada ko’rsatiladi. Bu o’ziga xos sozlanmalar panelida juda muhim va umumiy sozlanmalar jamlangan bo’lib, nima qilayotganingizni bilmaguningizcha sozlanmalarning birortasini ham o’zgartirmasligingiz kerak bo’ladi. Aks holda saytingizni ishdan chiqarib qo’yishingiz mumkin.

Siz uchun WordPressning standart sozlanmalar paneli imkoniyatlari keragidan ham ortiqcha bo’lishi mumkin. Ammo WordPressni o’rganayotgan ekanmiz, yashirilgan maxsus sozlanmalar panelining borligi, uning qanday ishlashi haqida bilmasdan o’tib keta olmaymiz. O’rganish maqsadida o’z saytingizda shu yashirin sozlanmalar panelini faollashtirishingiz va hech bo’lmaganda ko’rib chiqishingiz mumkin.

Yashirilgan sozlanmalar panelini ochish uchun saytingizning quyidagi manziliga murojaat qiling:

http://saytingiz-nomi.uz/wp-admin/options.php

Yuqoridagi sahifaga tashrif buyurganingiz zahoti Sizga saytingizdagi barcha mavjud sozlanmalar ko’rsatiladi:

WordPress haqida hamma narsani biz bilan birga o’rganing va har doim hayotning xavsiz tomonidan bo’ling 😉