Yii2 WordPress Veb dasturlash Startap Shaxsiy rivojlanish Sayt tayyorlash Qanday qilib Laravel Internetda pul ishlash Internet texnologiyalari Ingliz tili grammatikasi Ingliz tili

Umid yo’q! Dunyoni o’zgartirishga urunmang

Umid yo’q! Dunyoni o’zgartirishga urunmang

Ijtimoiy tarmoqlardagi gaplar, har xil yangiliklar asabimizni egovlab, umrimizni qisqartirayapti. Ba’zi izohlarni o’qiganimda ularni yozgan kishi allaqachon jahldan yoki jazavadan o’lgan bo’lsa kerak deb o’ylab qolaman. Ehtiroslar do’zaxdagi qozondek shaqirlab qaynaganda mantiq anchagina sustlashgani seziladi. Birodarlar, umid yo’q! Hech narsani o’zgartirib bo’lmaydi. Bizdan oldin ham shunday bo’lgan, biz o’tib ketganimizdan keyin keladigan yuz yilliklarda ham yana hammasi shunday davom etaveradi.

Faqat o’zingizga zarar

Har qancha asabiylashsangiz ham vaziyat o’zgarishsiz qolishini sezganmisiz? Dunyo sizning fikringizni hech qachon hisobga olmaydi. Bu hayotda siz ham, sizni fikringiz ham hech qanday ahamiyatga ega emas. Ana endi tinchlansangiz bo’ladi.

Voqelikni o’zgartiraman deb kuyib-pishishingiz faqat va faqat o’zingizga zarar beradi. Lekin bu harakatlaringizdan tashqi muhitingizga hech qanday ta’sir sezilmaydi. Samarasi bo’lmaydigan harakat uchun qancha asabingiz, bebaho sog’ligingiz, qimmatli vaqtingiz sarf bo’layotganini unutmang.

Asab kasalliklarini google qilib ko’rsangiz, bu turdagi dardning qanchalar ko’p ko’rinishi uchrashidan hayratga tushasiz. Asab kasalliklari deb kimdir siyg’oq bo’lib qolsa, yana kimdir eng sodda kundalik yumushlarini ham azob bilan bajaradigan bo’lib qoladi. Bular haqida o’qib faqat shukur qilasiz va har qanday asab buzarlik sizga zarar yetkazishiga arzimasligini tushunasiz.

Umid yo’q ekan. Nima qilish kerak?

Hayotdan zavqlaning! Sizga berilgan hayotni yashang va har bir kuningizni bayramdek o’tkazing. Hayotda “sal anaqaroq” bo’lish foydali ekanligini tushuning. Siz haqingizdagi boshqalarning fikri muhim emas. O’zingiz to’g’ri deb bilgan ishni qiling.

Dunyo o’zgarmaydi. Odamlar o’zgarmaydi. Siz boshqalar uchun qayg’urmang. Jamiyat uchun ham kuyunmang. Hech kimga yaxshilik qilmang, shunda yomonlik ham ko’rmaysiz. Odamlar juda noshukur. Odamlar juda hudbin. Ulardan faqat yuz o’girib qutulish mumkin. Bu hayotda umid yo’qligini tan oling va yengil tortib baxtli hayot boshlang.

Keyingi marta nimadandir siqilsangiz bu hayotda siz hech kim emasligingizni va bu hayot hech narsaga arzimaydigan bir lahza ekanligini eslang.

Fikr bildirish

Email manzilingiz chop etilmaydi. Majburiy bandlar * bilan belgilangan