Yii2 WordPress Web dasturlash Video dars Startap Shaxsiy rivojlanish SEO Sayt tayyorlash Qanday qilib Laravel Internetda pul ishlash Ingliz tili grammatikasi Ingliz tili IELTS

Muammolarni hal qilish

Muammolarni hal qilish

Hammada muammo bor. Zamonaviy dunyoda hech bir ish kichik bo’lsada muammosiz hal bo’lmaydigandek tuyuladi. Muammolarni hal qila olish qobiliyati kishidagi vaqt, asab va boshqa o’ta qimmatli, qayta topilmas narsalarni tejab qolishga yordam beradi. Sizda muammolarni hal qilishga nisbatan qachanlik samarali ko’nikma bo’lsa, Sizning hayotdagi muvaffaqiyatingiz darajasi ham shunchalik yuqori bo’lib boradi.

Hayotdagi barcha muammolarni bir xil vaqtda yoki bir xil usulda hal qilishning imkoni bo’lganda juda yaxshi bo’lardi. Ammo, afsuski, hayotimizda uchraydigan muammolar turlicha va ularning yechimi ham bir xil emas. Qaysidir muammo ko’proq e’tibor va kamroq vaqt talab qilgan holda hal etilsa, boshqalarida aksincha – e’tiborsiz harakat asosida bo’lsa ham ko’proq vaqt davomida sabr qilish talab etiladi.

Muammolarni hal qilishni yaxshi o’zlashtirish har qanday kishining hayotida juda ko’p marta asqotishi mumkin bo’lgan qimmatli ko’nikma hisoblanadi. Muammolarni hal qilish sohasini o’zlashtirishingiz davomida bu sohaning qanchalik murakkab ekanligini tushunasiz. Bunda barcha harakatni to’g’ri rejalashtirish qaysidir jihatdan asosiy omil bo’lishi mumkin. Shunday ekan, muammolarni hal qilish ko’nikmasini o’zlashtirishingiz davomida rejalashtirish va muammoni chuqur o’rganib chiqishga alohida e’tibor bilan yondoshing.

Muammolarni hal qila olmaslik tufayli dunyoda har kuni bir necha minglab shaxsiy munosabatlar buzuladi, tijoratlar yo’qqa chiqadi, xalqaro kelishmovchiliklar yuzaga keladi. Buning sababi esa muammoni vaqtida taniy olmaslik, asosiy sababni aniqlay olmaslik yoki kerakli vaqtda muammoni to’g’ri hal qilish uchun to’g’ri qaror qabul qila olmaslik hisoblanadi.

AQSh hukumatining sobiq xizmatchisi John Foster Dulles muammolarni hal qilish borasida “Muvaffaqiyat o’lchovi Sizda qiyin muammoning yo’qligi bilan emas, balki o’tgan yilgi muammongizning yo’qligi bilan belgilanadi“, degan edi.

Muammolar ko’pincha guruh shaklida, uyushga holda hal qilinganda yaxshi natija beradi. Sizda qandaydir muammo borligini do’stingiz yoki maslahat olishingiz mumkin bo’lgan yana boshqa biror kishiga aytishdan tortinmang. Chunki muammolar haqida kim bilandir o’rtoqlashish Sizni uning oqibatida kelib chiqishi mumkin bo’lgan qo’rquv yoki haddan ortiq toliqishdan asrasa, betaraf bo’lgan kishining muammoni hal qilishga oid fikri, taklifi uni hal qilish yo’lida yaxshi samara beruvchi yo’riqnoma bo’lib xizmat qilishi mumkin.

Qaysidir muammoni hal qilishga kirishishimizdan avval muammoning o’zi nima ekanligi haqida bosh qotirib ko’rishimiz kerak.

Muammo nima?

“Muammo” so’zi lug’atda “yechim talab qiladigan noaniq va qiyin masala”, deb ta’riflangan ekan. Yana bitta boshqasida esa “tushunish, bajarish yoki amalga oshirish qiyin bo’lgan narsa”, deya ta’riflanibdi.

Barcha muammolarning ikkita o’xshash jihatlari bor: maqsad va to’siq.

Maqsad borligi uchun, unga intilish bo’lganligi sababli bizda muammolar bo’ladi. Umuman, biz maqsadimiz sari odimlayotganimizda yo’limizni to’sishi mumkin bo’lgan har qanday masala biz uchun muammo hisoblanadi. Bunda muammoni yengish maqsadga yetib borish bilan barobardir. Maqsadingizga erishishning bitta yo’lini topa olmadingizmi, demak bu Siz uchun muammo. Maqsadga erishishning ikkinchi, uchinchi, to’rtinchi… yo’llarini topishingiz esa Sizdagi mavjud maummoning hal qilinishi bilan tengdir.

To’siq har qanday maqsadga intilish jarayonida paydo bo’lishi mumkin bo’lgan holatdir. Maqsad yo’lida paydo bo’lgan to’siq muammoning o’zi hisoblanadi. To’siq bo’lmaganida muammo ham bo’lmasdi. Demak, to’siq muammoning mavjudligi bilan bog’liq.

Maqsadingiz bo’lsa va unga erishish yo’lida to’siqlarga duch kelayotgan bo’lsangiz, demak Sizda muammo bor. Uni qanday qilib bartaraf etasiz?

Har qanday muammo izchil, rejalashtirilgan, bosqichma-bosqich harakatlar asosida samarali bartaraf etilishi mumkin. Har qanday muammoni bartafar etishning bosqichma-bosqich rejasi quyidagicha:

1. MUAMMONI ANIQLAB OLING. Biz nimani hal qilishga urinayotganimiz haqida chuqurroq o’ylab ko’rishimiz zarur. O’ylang, muammo o’zi nimada? Siz bilan yuz berayotgan ko’ngilsiz holatlarning asl sababi – bosh muammo aslida butunlay boshqa narsa bo’lishi mumkin. Shuning uchun hal qilishga kirishishdan avval muammoning o’zi nima ekanligini aniqlab olishingiz kerak.

2. MUAMMOLARNI TARMOQ SHAKLIDA BIRLASHTIRISH. Hech bir kishida faqat bitta muammo bo’lmaydi. Muammolar har doim bir necha sonli bo’ladi. Siz o’zingizdagi barcha muammolarni tarmoqli shaklda birlashtirib chiqing. Barcha kichik muammolar asosiy – eng katta muammoga borib taqalishi kerak. Bu amaliyotning foydali jihati shundaki, u orqali qaysi muammo qayerdan kelib chiqayotganligini va uning asosiy sababchisi nima ekanligini osongina aniqlab olasiz.

3. IMKONLI YECHIMLARNI SANAB CHIQING. Asosiy muammo nima ekanligini bilib olganimizdan so’ng uni bartaraf etishda qanday harakatlar qilishimiz kerakligi haqida o’ylashimiz mumkin. Muammoning asosiy yechimlari haqida o’ylang. Ular bir nechta bo’lishi mumkin. Sanang. Muammoni hal qilishingizning nechta yo’li bor?

4. QAROR QILING. Sanab o’tilgan barcha tahminiy yechimlardan faqat bittasini tanlang va o’zingizdagi muammoni aynan shu yechim bilan hal qilishga qaror qiling. Bu bosqichda ikkilanish faqat Sizga qarshi holat bo’ladi. Hech narsadan qo’rqamasdan muammoni hal qilishga qaror qiling.

5. HAYOLAN QAROR QILINGAN YECHIMNI AMALGA OSHIRING. Ishni haqiqiy hayotda amalga oshirishga nisbatan hayolda sinab ko’rish kelajakda yo’l qo’yilishi mumkin bo’lgan xato yoki kamchiliklarning oldini olishda muhim rol o’ynaydi. Bir necha daqiqani qilgan qaroringizni o’ylashga, uning asosida qanday yo’l tutishingiz va natija qanday bo’lishi mumkinligini o’ylashga sarflang. Ishoning, bu bosqichdan keyin juda ko’p narsalar Sizga avvalgidan yaxshiroq tushunarli bo’ladi.

6. QARORINGIZ VA REJANGIZNI MASLAHATLASHING. Qanday qarorga kelib, nima ish qilmoqchi bo’lganingizdan qat’iy nazar kim bilandir fikrlaringizni o’rtoqlashing. Maslahatlashish hech qachon zarar keltirmaydi. Albatta, maslahat beruvchi suhbatdoshingizni to’g’ri tanlashga ham alohida e’tibor qaratishingiz kerak. Suhbatdoshingizning fikrini bilganingizdan so’ng uning dunyoqarashi asosida tug’ilgan yangi fikrlaringizni saralab oling va o’z qaroringizni mustahkamlang.

Yuqoridagi barcha bosqichlardan o’tganingizdan so’ng Siz muammoni hal qiluvchi harakatlarni boshlashga to’liq tayyor bo’lasiz! Unutmang, har qanday muammoni puxta o’ylangan tadbir bilan hal qilish mumkin. Muammolar hayotda muvaffaqiyatli inson bo’lishingiz yo’liga to’siqlar qo’yishiga yo’l qo’ymang!

Fikr bildirish

Email manzilingiz chop etilmaydi. Majburiy bandlar * bilan belgilangan